Mixed berries pie - فطيرة التوت

السلام عليكم و رحمة الله و بركاته 

رمضان مبارك 

سويت فطيرة التوت اليوم، طريقتها سهله مايبيلها شغل 

بس تحوّست معنا شوي و الحشوه صارت مره سايله

اهم شي طعمها طلع زين 

على أساس صوره تحميسيه :) 

: نحتاج

: للعجينه

كوبين و نص طحين 

ربع ملعقة شاهي ملح 

كاس زبده بارده ، مقطعه مربعات

ثمان ملاعق مويه مثلجه 

 : للحشوة

كوب سكر 

ربع كوب نشا الذره

رشة ملح 

ثلث كوب مويه 

( نص ملعقه صغيره قرفه مطحونه ( اختياري

كوب توت ازرق طازج 

كوب توت احمر طازج

كوب فراوله مقطعه 

ثلاث ارباع كوب توت اسود طازج 

ملعقة طعام عصير ليمون

: الطريقة  

في صحن كبير، نخلط الدقيق و الملح، نضيف الزبده لهم لما تكون عجينه متفتته. نضيف المويه المثلجه على دفعات، نضغطها

بشوكه لما تكون العجينه متماسكه. نفصل العجينه لقطعتين وحده تكون اكبر من الثانيه، نشكل كل وحده دائره، نلفها ببلاستك و ندخلها الثلاجه ليله كامله

للخليط: في قدر متوسط، نخلط السكر، نشا الذره، المويه و القرفه و الملح حتى تصير ناعمه، نضيف التوت الازرق. لما تغلي نحركها لمدة تقريباً دقيقتين او حتى تصير ثقيله. نشيلها عن النار و نتركها تبرد 

نسخن الفرن على 400 فهرنهايت، 200 سيلزيوز، 6 غاز. نخلط التوت الاحمر و الاسود، الفراوله و عصير الليمون على الخليط. نحط شوي دقيق على سطح مستوي و نفرد العجينهلما تصير دائره تقريبا 1.6 انش، ننقلها لصينية الباي، استعملت مقاس 11 انش. نضيف الحشوه، نفرد العجينه الثانيه لنفس الحجم 1.6 انش، نقطعها لخطوط طويله، نرتبها فوق 

 :) الحشوه يطلع شكلها في الاخير زي السله 

ندخلها الفرن لمدة 10 دقايق، بعدين نقلل الحراره ل 350 فهرنهايت، 180 سيلزيوز،  4 غاز. نخبزها ل45-50 دقيقه، او لما تكون العجينه ذهبيه و الحشوه تغلي، نتركها تبرد و نقدمها 

شوفوا ورا كيف مره طلعت حوسه، بس لذيذه ترا

Bon Appétit

pretzel-chicken sliders - قطع الدجاج بالبرتزل

السلام عليكم 

:نحتاج 

صدور دجاج  

( برتزل  مكسر ( تلقونه في كل السوبرماركت

بيضه

ملح، فلفل اسود

فلفل احمر 

ريحان 

:الطريقه 

نقطع صدور الدجاج مربعات، في صحن نكسر البيضه و نخفقها، في صحن ثاني نخلط الملح و الفلفل و الريحان، نغمس الدجاج اول شي في البهارات بعدين البيضه بعدين نغطيها بالبرتزل. نحط الدجاج في صينيه و ندخله الفرن على حرارة 400 فهرنهايت لمدة 20 دقيقه او اقل

بس، أسهل من كذا؟ 

 :) الصدق طعمها عادي مو مره، كانت ناشفه شوي يبغالها صوص، اكلناها مع شطة ناندوز 

Bon Appetit   

Brownies - براوني

السلام عليكم 

أنا مره اتعيجز اسوي براوني عشان احس الطريقه طويله و صعبه، بس يوم سويته طلع مره سهل و لذييييذ 

!بس يبغالكم معه حليب بارد ولا قهوه لانه ثقيل 

يوم جيت اصور قررت الكاميرا يخلص شحنها فصورت من الجوال :) 

:نحتاج

( نص كوب زبده ( 100 غرام

شوكلاته خام 300 غرام، مقطعه

ثلاث ارباع كوب سكر

ربع كوب سكر بني 

ثلاث بيضات كبار

ملعقة فانيلا 

- نص كوب و ملعقتين اكل دقيق - انتبهو للكميه عشان لو زاد بيصير كيك 

ملعقين شوكلاته بودره مرّه 

ربع ملعقه صغيره ملح

قطع شوكلاته 

:الطريقه

 نسخن الفرن على درجة حراره 400 فهرنهايت، 6 للغاز 

نذوب الشوكلاته و الزبده في الميكروويف أو حمام مائي، نخليها تبرد ، في صحن كبير نبدا نخلط البيض مع السكر بعدين

 نضيف الشوكلاته. ونخلطهم. نضيف البيض وحده وحده و نخلطهم كويس

 في صحن ثاني نحط الدقيق ، الفانيلا ، الملح نخلطهم سوا بعدين نضيف ربع الدقيق على خليط الشوكلاته نحرك كويس و نضيف الباقي و نحرك، بعدين نضيف الشوكلاته البودره و قطع الشوكلاته

نحط البراوني في صينيه مغطيه بورق زبده و بعد لو ترشون الصينيه بزيت اضمن عشان مايتلصق 

ندخلها الفرن 20 دقيقه او لما تصير الطبقه اللي فوق شوي كرسبي 

Bon Appetit

Restaurant review: Anthurium

السلام عليكم 

وعدت نفسي اني ما انسى المدونة في 2015 يارب اسوي الوعد :)

و انتم ايش اهدافكم في هذي السنه؟ 

-

التقرير اليوم بيكون عن مطعم انتوريوم في التحليه، شارع عبدالله الحمدان 

..المطعم عالمي فيه من كل الاطباق، مشهور بالسوشي و الماكي أكثر شي

فيه قسم للعوائل و قسم للأفراد، ممنوع دخول الاطفال اقل من 6 سنوات. المطعم دورين الدور اللي تحت عوائل بدون بارتشن، اللي يبي بارتشن يقعد فوق، و الأفراد في الدور الثاني يفصل بينهم و بين العوائل حاجز

الجلسات مره رايقه و هاااديه بس الطاولات صغيره شوي يصير زحمه لو جابوا كل الطلبات لول 

الدور العلوي فيه موسيقى، مريحه ماتخرب الجو بس اللي مايبي يجلس تحت مايشغلون

خدمتهم جيده بس انهم فاهين شوي، يعني انا رايحين حاجزه طاوله و أول مادخلنا قلت ابي فوق بعدين يوم رحنا فوق جلسو يناظرون بعض و يسألون فيه حجز؟ فيه حجز؟ لما بعدين قرروا يجلسونا :) 

الوقت اللي رحنا فيه كان بعد صلاة العشاء وكان فاااضي مافيه الا انّا، بس لما جينا نطلع كانت الساعه 11 الا ربع تقريباً،  كان مره زحمه تحت و فوق كلها محجوزه الطاولات

الحين الأكل، البحري اللي طلبناه لذييييذ جداً! الماكي لذيذ بعد بس مو مثل ما كنت متخيلته، الحلى ماعجبني 

 :) و الأسعار نار 

-فاصل قبل لا نكمل: ليتني اقدر احط ايموجي ما اعرف كذا :( -

:طلباتنا

نعتذر عن بشاعة الصور الاضاءه ماكانت تساعد و اختكم في الله نست كيف تستخدم الكاميرا لول

 هذي كانت الضيافة، خبز و اللي في الصحن: لبنة، حمص، الاحمر و الاصفر ما اعرف وشي بس طعمهم زين 

starters 

shrimp Burtugues جمبري برازيلي 

اتوقع كانوا 4 حبات و فوقهم الجرجير 

ليّن مره، طِعمه و مع الصوص لذيذ 

يقدمون معاه خبز بالجبن 

سعره 80 ريال 

-

 سلطة الجرجير 

أنا شخص يعشق الجرجير بكل الاشكال و الأنواع بس هذي السلطه ماعجبتني مره

هي جرجير مع فطر و تشيري توميتو و بارميزان و بالسميك 

طعم البالسميك مره خفيف انا احبه يكون مركّز 

حليوه يعني و كميتها كويسه 

سعرها 47 ريال

-

main dishes

shrimp tapaniaky جمبري تبنياكي

هذا كان ملك العشاء 

الجمبري مره كبار و شوفو في الصوره مقطعه و ستِل كبيره 

معاه خضار مشويه اتوقع، نوعين فطر و كوسه و اشياء ثانيه ماعرفت اكتشفها 

.الطعم :( لذيييييييذ 

كلنا اعجبنا 

-اشتهيته :(-

سعره 130 ريال 

-

  

الماكي طلبنا 

على اليسار

dynamite rolls ديناميت رولز 

 اليمين 

crazy rolls كريزي رولز 

الديناميت كانت ربيان مقلي و معه خضار و فوقها سبايسي مايونيز

الكريزي رولز بالكراب، الرز مقرمش و فوقها كراب زياده 

عجبني الديناميت أكثر حسيت النكهه اقوى، ماما و أختي عجبهم الكريزي 

close up

الديناميت سعره 60 ريال

كريزي رولز 75 ريال

-

المشروبات عصير برتقال و فراوله 

البرتقال 20 ريال 

الفراوله 17 ريال 

-

dessert 

 

chocolate fondant  (سوفليه على قولتنا)

كيكة شوكلاته و من جوا شوكلاته سايله 

مقدمينها مع ايسكريم و فراوله 

حلوه بس مافيها فكره جديده نفس كل المطاعم 

سعرها 64 ريال

-

profitrolls بروفيترول

حلا يشبه الاكلير محشي جبنة ماسكربوني و فوقها شوكلاته و مكسرات 

نفس التقديم آيسكريم و فراوله 

هذي اكس عليها، مره قاسيه و طعمها كله بندق 

 >< سعرها 46 ريال 

-

macchiato ماكياتو

الكوب مره صغييير حق تركش و اسبرسو 

طعمه عادي جداً 

سعره 11 ريال

-

الاكل خفيف بس يشبع 

المنيو عندهم متنوع مره و يعجب كل الاذواق

كنت ابغا اجرب الساشيمي بس ما ياكل سمك نيْ الا أنا فخفت يطلع كثير 

منيو الحلا و القهوه بشكل عام ماعجبني، يعني مقارنة بالأكل يعتبر ولا شيء

أكثر شي عجبني هو طريقة التقديم للحلا 

..اما القهوه تعصب صغيره

خلصت ان شاءلله عجبكم التقرير و اشوفكم في حلقات جايه

Restaurant review: Nino

السلام عليكم و رحمة الله و بركاته 

كل عام و انتم بخير :) 

ريفيو اليوم عن مطعم نينو في التحليه 

نتكلم اول شي عن الجو العام للمطعم، رحنا الساعه 9 ونص تقريباً و كان مره  زحمه و الناس تجي بالملايين ماشاءالله لول

انتظرنا 20 دقيقه بعدين جلسنا، المطعم ازعاج مره و مع انه ما يعتبر صغير بس احس الناس داخلين ببعض  

 أكلهم مره عادي ماعجبني :/ يعني كنت متوقعته مره طِعم، احس عشاني 

متحمسه عليه طلع عادي هههه 

خدمتهم كويسه ما عليها بس مره تأخروا ماجابوا المشروبات و البيتزا 

تقريباً جلسنا نص ساعه بعد ما جابوا الطلبات بعدين جابوا البيتزا

بس اتوقع عشان الزحمه؟ 

 اسعارهم من متوسط الى مرتفع، جلساتهم حليوه بس ظلام شوي، المنيو متنوع فيه  كل انواع الاكل ماشاءالله

نجي لطلباتنا 

هذي يقدمونها ضيافه٫ خبز مع زبده

المقبلات 

سلطة كريسبي تشكن 

لذييييييذه احلا شي طلبناه 

خس وجرجير وملفوف و الصوص رانش وبارميزان لكم ان تتخيلون الطعم كيف يطلع :(:( 

الدجاج اللي معها لذيذ بعد بالبلسميك 

مره لذيذه اللي يروح لازم يطلبها 

سعرها 53 ريال 

بولو فريتو امريكانو 

قطع دجاج مقليه، الصوص مفروض هالبينو تشدر بس طعمه ماسترد مدري كيف تجي

ماعجبتني الدجاج مافيه طعم والصوص مره ماسترد ماحبه 

نچت هرفي احلا 

 سعرها 49 ريال

نينو كاليفورنيا 

هذي اخترته عشان قد ذقت عندهم سوشي من زمان و عجبني مره كان لذيذ حسبت ان هذا هو نفسه بس طلع مو هو 

طعمه حلو بس مايقارن باللي ذقته اول هههه 

سعره ما اعرف ما كتبته 

الاطباق الرئيسيه 

ريزوتو كون بولو 

نجم الحفله :):) 

هذا طلبي طبعاً ريزوتو لول، بالدجاج و الزعفران 

طعمه حلو، ثاني احلا طبق بعد السلطه 

سعره 67 ريال

فيتيلو ال تارتوفو 

لحم عجل بالزبده و الاعشاب و المشروم و بوريه بطاطس 

هذا الطبق ما جاز لي ابدا ابدا 

 T_T اول شي عشان طريقة التقديم، في المنيو كان شكله مره حلو ومرتب ليش كذا  

مو واضح طعم اللحم و احسه كان يحتاج ملح زياده 
-الماش بوتيتو مره يمي -على كلام رغد هي اللي طالبته

سعره 87 ريال

بولو كروكانتي 

هذي الباستا عاد شي ثاني ههههههههه 
!ابدا مو حلوه 

صدق يعني بدون مبالغه اللي نسويها بالبيت احلا بكثير
مفروض انها بينّي مع صلصة الشدر بس الصلصه كريمة طبخ لول

الدجاج قاسي، شكل عندهم مشكله مع الدجاج لول 
 باختصار لا تطلبونها

سعرها 65 ريال

بيتزا أمريكانو 

بيتزا بيبيروني وجبنه بروفلون 
ناشفه و مقرمشه المفروض ان هذي سميكه >.< 
ماعجبتني كانها خبز تميس 

سعرها 55


المشروبات 

طلبنا عصير كيوي،، ليمون و نعناع، برتقال، كوكتيل ايجانو 

هذا يقولون انه عصير كيوي، طعمه مره شين الله يكرم النعمه ياحلو حق المراعي T_T 
اتوقع حاطين ماء فوار و رغوه ؟ 

جيجي تقول حامض 

العصيرات 21 ريال

كوكتيل ايجانو
زنجبيل، كزبره، نعناع، عصير ليمون، عصير توت، ليمونيد

لذيذ 
29 ريال 


ابغا ارجعله مره ثانيه عشان احس حرام حلو بس يمكن طلباتنا شينه هههههه 

لو رجعت ابغا اجرب 

سلطة الاورجولا 
فرايد شورت ريبس 
نينو ماكي بلاتر 
♥ و اكيد كرسبي تشكن سلاد 


بس اشوفكم في الريفيو القادم، و عيد سعيد 

ccc aka chocolate cheesecake - تشيزكيك الشوكولاته

 السلام عليكم و رحمة الله و بركاته 

-كيف الحال؟ -كأن فيه أحد يشوف

وصفة اليوم قد نزلتها في مدونتي القديمه اللي نسيتها 

T_T وكنت مصوره لها صور مره حلوه بس شكلي حذفتها 

لزيزه آوي آوي 

أخذتها من بلوقر اجنبيه 

:أول شيء المقادير

كوب بسكوت مطحون، أستخدمت دايچستف 

4 ملاعق بودرة شوكولا مره

ربع كوب زبده ذايبه

500 غرام جبن فيلاديلفيا 

ثلاث ارباع الكوب سكر بودره 

ملعقه صغيره فانيلا

(bittersweet) ثلاث ارباع الكوب شوكلاته مقطعه، أو الشوكلت تشبس 

(semisweet) ثلاث ارباع الكوب شوكلاته مقطعه، أو الشوكلت تشبس  

كوبين كريمة خفق 

ربع كوب شوكلا بودره للوجه 

:الطريقه

في صحن متوسط نخلط البسكوت المطحون و الشوكلا البودره مع الزبده، نمزجهم كويس بعدين نضغطه في الصينيه، نتركه على جنب.

.في صحن ثاني كبير  نخفق الجبن لمدة دقيقه لما تصير خفيفه، نضيف السكر و نخلط بعدين نضيف الفانيلا

نذوب الشوكلت بحمام مائي، نخليه يبرد شوي، نخلي الخلاط على السرعة البطيئه ونضيف الشوكلت على خليط الجبن و نخلطهم.

نخفق الكريمه لما تصير قاسيه شوي (ماتصير سايله مره) بعدين نضيفها لخليط الشوكلت و الجبن، نمزجها معهم كأننا نلف شيء (نطوي باللغه العربيه ههه)، نصب الخليط على البسكوت في الصينيه 

ندخله الثلاجه تقريباً 8 ساعات و حسن لو ليلة كامله

اذا جهز التشيزكيك، نمشي سكينه على أطراف الصينيه عشان يطلع بسرعه هيهي

نرش عليه شوكلا بودره عند التقديم

هذي الصوره الوحيده اللي نجت و بعد دقتها خايسه عشان كانت في الجوال 

T_T


*ps: من أسبوع كاتبه البوست بس رحت اسويها مره ثانيه عشان اصور و بعدين تعيجزت *

BON APPÉTIT

chicken brist sandwich

السلام عليكم

أخيراً بحط الطريقه من سنه تقريباً مسويه الساندويتش :) 

:نحتاج

3 صدور دجاج

ملح 

فلفل 

بابريكا

ملعقه صغيره مسترد

زبادي 

جبن شرايح

خس 

طماطم 

مخلل خيار

ملعقتين مايونيز

ملعقة شاي عصير ليمون

ملعقتين صوص رانش

:الطريقه

ندق الدجاج عشان يصير اسهل بالأكل

نخلط الزبادي و المسترد و البهارات في صحن ، نحط الدجاج و ندخله الثلاجه أقل شي نص ساعه

نطبخ الدجاج على پان مرشوشه زيت، اذا استوت نحط الجبن فوقها

..نسوي صوص: نقطع المخلل مربعات صغار، نخلط المايونيز مع الرانش و عصير الليمون

نحطهم في الخبز 

BON APPETIT